Michael Jackson yatinze gushyingurwa kubera ikibazo cy’ibihumbi 30$

Byamenyekanye ko Michael Jackson yamaze igihe kigera ku mezi atatu atarashyingurwa kubera ikibazo cy’ibihumbi 30 by’amadorari kigaragaramo mushikiwe Janet nkuko byatangajwe mu gitabo gishya cyasohotse.

Yashyinguwe nyuma y’amezi atatu yitabye Imana

Nyuma y’urupfu rw’uyu mwami wa muzika ya Pop tariki 26/06/2009 haciyemo igihe kinini atarashyingurwa, bamwe bibazaga ko umubiri we ugisuzumwa, abandi bakavuga ko hategerejwe ko abo mu muryango we bazemezwa aho ashyingurwa, ndetse hakaba n’abatebyaga ko uyu mugabo yaba yari yaraguze ikibanza ku mubumbe w’Ukwezi azashyingurwaho.

Nubwo Jackson yasezewe tariki 7/07/2009 muri stade y’ikipe ya Los Angeles Lakers ya Staples Center, umubiri we washyizwe mu mva tariki 3/09/209 amezi hafi atatu nyuma y’urupfu rwe.

Nyuma y’urupfu rwa Jackson, iki gitabo ku buzima bwe cyasohotse kivuga ko mushiki we Janet yishyuye ibihumbi 30 by’amadorari ku kibanza kizajyamo imva ya musaza we, ariko agasaba ko azayasubizwa mbere y’uko ashyingurwa.

Gusa uyu mugore ubu w’imyaka 46 yanze ko musaza we ashyingurwa mu kibanza mu gihe yari atarasubizwa ibyo bihumbi bye yishyuye ikibanza.

Iki gitabo cyasohotse cyitwa “Untouchable” kivuga kandi uburyo bamwe mu bavandimwe ba Michael Jackson nyuma y’urupfu bagiye munzu ye bagasaka ahantu hose bashakisha amafaranga, dore ko Jackson byavugwaga ko atunze miliyoni magana atatu z’amadorari.

Mu irimbi rya Forest Lawn aho Janet yaguze ikibanza bagashyingura musaza we ari uko babanje kumwishyura

Aho umubiri we uruhukiye mu irimbi Forest Lawn ahitwa Glendale, California

AP 

Egide RWEMA
UMUSEKE.COM